Ġorġ Mallia huwa akkademiku tal-kommunikazzjoni, awtur u kartunist li jaħdem fuq il-gżira ta' Malta. Huwa senior lecturer fil-Fakultà tal-Midja u x-Xjenzi tal-Għerf, fl-Università ta' Malta.

Għandu B.A.(Hons) fil-Letteratura Ingliża u M.A. fil-Kommunikazzjoni, it-tnejn mill-Università ta' Malta, u Ph.D fit-Teknoloġija tat-Tagħlim mill-Università ta' Sheffield, l-Ingilterra. Jispeċjalizza fil-Midja tal-Istampar u l-Preżentazzjoni, Komunikazzjoni Personali, Branding Personali, u d-Disinn u t-Teknoloġija tat-Tagħlim (l-aktar it-Trasferiment tat-Tagħlim). Ir-riċerka li qiegħed jagħmel bħalissa hija prinċipalment fuq il-bidla fl-ipproċessar konjittiv imqanqla mill-użu qawwi tat-teknoloġiji l-ġodda tal-kommunikazzjoni. Taqsima qasira dwar l-interessi akkademiċi tiegħu tinstab f'din il-websajt.

Ippreżenta f'għadd ta' konferenza internazzjonli, u ppubblika fl-oqsma li hu espert fihom. Huwa guest lecturer fl-Università ta' Malmö, u llekċerja wkoll fl-Università ta' Lund, it-tnejn fl-Isvezja.

Ġorġ Mallia ppubblika kotba ta' stejjer għat-tfal, li huma wkoll illustrati minnu, kif ukoll kotba ta' novelli esperimentali. Ipproduċa dik li kienet fi żmienha l-unika strixxa ta' komiks soċjo-politika fil-pajjiż (One Family) f'The Sunday Times bejn l-1993 u l-2008. Ippubblika estensivament (bil-Malti u bl-Ingliż) kemm fl-oqsma akkademiċi li jinteressaw, kif ukoll kreattivament, stejjer għaż-żgħar u għall-kbar. Il-kotba tiegħu dwar "Pullu" għat-tfal żgħar ħafna huma fost l-aktar kotba li nbiegħu għal dik l-età f'Malta. 

Dr Mallia pproduċa u ppreżenta wkoll għadd ta' programmi fuq it-televiżjoni nazzjonali u fuq ir-radju. Bħalissa hu l-president tal-Kunsill Nazzjonali tal-Ktieb f'Malta.

CV sħiħa tinsab f'dan is-sit.